ليه العالم كله مش بيتكلم لغة واحدة؟

قصص مشهورة عن اسباب تعدد اللغات وليه العالم كله مش بيتكلم لغة واحدة

مرحبا بكم متابعينا وزوارنا الكرام  

في واحده من القصص المشهوره جدا والمتداوله بين الناس ، هي ان البشر قديما كانوا كلهم بيتكلموا لغه واحده وكانت الدنيا حلوه وجميله ،

 ولكن في يوم من الايام قرر بعض الناس أنهم يبنوا برج عالي جدا علشان يوصلوا بيه للسماء

والبرج ده بالتحديد كان في مدينه بابل المهم انهم بعد الانتهاء من بناء البرج

 وبدأو بالصعود عليه فنزل عليهم غضب من السماء خلاهم يخافوا و يتفرقوا

ولسانهم تغير واصبح كل مجموعه منهم بتتكلم بلغه غير مفهومه بالنسبه للمجموعات الثانيه

هنتعرف ونجاوب علي سؤال ليه العالم كله مش بيتكلم لغة واحدة؟

وقبل ما نبدا لو لسا جديد في القناة

متنساش تعمل سبسكرايب وتفعل الجرس علشان توصلك فيديوهاتنا اول باول

شكل الكلمات في اللغات الاخري

بالرغم من انتشار القصه اللي قولناها في بداية الموضوع بشكل كبير الا ان ما فيش اي دليل عليها وبيتم الاشاره لها بانها شبه الاسطوره

فلو قولتلك مرحبا بالعربي هتلاحظ ان ليها نظائر في اللغات التانية زي

Hello بالانجليزية او Hola بالاسبانية او Ciao بالايطالية

او Bonjour بالفرنسية  او  او Привет بالروسية

او こんにちは باليابانية او 你好 بالصينية

 العالم حوالينا بيتكلم عدد ضخم جدا من اللغات ، والبشر مجتمعين بيتكلموا حوالي 7000 لغة مختلفة والرقم ده فعلا مخيف

واللي بيزود الطين بله كل لغة من ال 7000 لغة دول بيبقي ليها اكثر من لهجه

وليها اكثر من طريقه في النطق

لكن يا ترى ليه في لغات ولهجات مختلفه وليه منتفقش كلنا على لغة وحدة ونتكلم بيها وخلاص

وبالتالي كل الناس تفهم بعضها ونرتاح من وجع القلب

قصة تمهيدية

خلوني امهدلكم اللي جاي دا بقصة طريفة

خلينا نفترض أن فيه اثنين اصحاب اسمهم امير و سعيد وكانوا عايشين مع بعض في سعادة

لكن بعد فترة المكان حواليهم بدا يتوسع و كل واحد فيهم اضطر أنه يهاجر مع أهله الي مكان بعيد ومنعزل

ولما امير واهله شافوا حيوان غريب شبه الحمار جسمه كان مخطط باللون الابيض والاسود قرروا انهم يسموه سكر

وبالصدفه البحته سعيد واهله شافه نفس الحيوان ولكن لانهم في مكان منعزل عن امير واهله قرروا انهم كمان يسموه باسم من عندهم واستقروا على اسم ملح

وبعد مرور 10 سنين اتقابل امير وسعيد مره ثانيه وامير تفاجئ ان سعيد راكب على ضهر سكر

 وماسك في ايده عصايه خشب وعمال يضرب فيه ، فزعقله وقاله حرام عليك يا ابني انت بتضرب في سكر كده ليه

فرد سعيد وقاله سكر ايه يا ابني دا ملح

ومن هنا ظهرت لحظه صمت ونظرات استغراب

فالمشكله هنا مش ان الحمار الوحشي هيبقى اسمه سكر ولا ملح المشكله اكبر من كده بكتير وان عيله امير  و عيله سعيد قابله في رحلتهم حيوانات ونباتات وجمادات جديدة كتير جدا جدا

وللاسف الشديد كل عيله منهم اطلقت على الحاجات اللي قابلتها اسم مختلف تماما عن الاسم اللي العيله الثانيه اطلقته

وبالتالي اصبح في عدد ماهول من الكلمات المختلفه بين لغه العيلتين اللي كانت اصلا في الاساس لغه وحده

وبالرغم من ان قصه امير وسعيد اصحابنا دول هزليه وطريفه ومش موجوده في الحقيقه

السبب الحقيقي في تعدد اللغات

فالسناريو ده هو اللي حصل بالضبط وهو برده السبب في اختلاف اللغات

والمجتمعات والشعوب تفرقوا عن بعض وبدا يقابلهم حاجات جديده في حياتهم اليوميه وكانوا مضطرين انهم يخترعوا اسماء جديده للحاجات دي علشان يقدروا يتعاملوا معاها

وده ما كانش بس في الحاجات الموجوده في الطبيعه اللي زي الحيوانات والنباتات

وكمان الادوات والمعدات اللي بدات تظهر في حياتهم بالتدريج زي السرير والكرسي والاسلحه وسلة الطعام

كل دي كان ليها اسماء و القاب مختلفه

 ولو المده اللي بعدها عيله امير عن عيله سعيد كانت عشر سنين

فالشعوب القديمه كانت بتبعد عن بعض وبتخلوا بنفسها لآلاف السنين تخيل الف سنه من المفردات والكلمات الجديده ممكن تعمل ايه في اللغه الام

بالضبط كده زي ما انت خمنت اللغة الام تكاد تنمحي  وتتخلق مكانها لغه جديده

في الواقع تغيير مفردات اللغه وكلماتها مش هو السبب الوحيد في اختلاف اللغات في العالم

طريقه نطق اللغه وطريقه استخدام مفرداتها بيختلف من جيل للتاني عند اهل اللغه الواحدة وبالرغم من ان التغير ده بيكون بطيء نسبيا الا انه بيكون مؤثر جدا

فعلى سبيل المثال اللغه الانجليزيه بتتغير من سنه للتانيه ولو حد من الانجليز اللي موجودين في العصر الحالي جرب ان يقرا نص او وثيقة انجليزيه قديمه

هيلاقيها مختلفه جدا عن لغته الحاليا ومش بعيد كمان يفكر ان النص اللي مكتوب ده ايطالي مثلا او الماني

والموضوع ده مش في الانجليزي وبس احنا كعرب ما نعرفش كثير من المفردات والمصطلحات الخاصه باللغه العربيه بسبب عنصر الزمن و بسبب التطور المستمر في استخدامات اللغه

فلو جيت تقرا قصيدة من القصائد القديمة زي وحدة من المعلقات دي

ولكن بسبب عامل الزمن و بسبب قلة الكلمات اللي موجودة منها اصبحوا كلمات غريبه وغير مفهومه

حتى بالنسبه لاصحاب اللغه نفسها

كيفية تقسيم اللغات واصلها ايه؟

اذا اي لغه موجودة في العالم في الوقت الحالي ما ظهرتش كده من تلقاء نفسها ولكنها مشتقة من لغة ثانية أقدم منها

وحتى اللغة القديمه اللي هي مشتقة منها دي هي كمان مشتقة من لغة أقدم منها وليله كبيرة سعادتك

وهنفضل علي كده لحد ما نوصل في النهاية للغة الام واللي هي الأساس اللي تتفرع منه كل اللغات اللي ظهرت فيما بعد

ومش بس كده ممكن كمان نقسم اللغات دي الي عائلات ومجموعات يعني كل مجموعة من اللغات دي تنتمي لعائلة معينة ومشتقة منها

هنلاقي مثلا اللغه العربيه والاراميه والاثيوبيه والتشادية كلهم قرايب ينتمون لعائلة واحدة

وكمان الانجليزيه والفرنسيه والروسيه والهنديه هنلاقيهم برده هما قرايب ينتموا لعيلة واحدة

ففي النهاية كان زمان لغة واحدة تجمع كل البشر وبدأ ينشق من اللغه دي تدريجيا لغات تانية بل وعائلات كامله من اللغات واللهجات

وبسبب ان الناس بدأت اعدادهم تكبر وبدأوا ينتشروا في الارض ويبعدوا عن بعض ويعيشوا في اماكن جديده

و بالرغم من انهم قبل ما يهاجروا ويتفرقوا كانوا بيتكلموا نفس اللغه الا انه حصل حاجه ما كانتش في الحسبان وغيرت كل الموازين

فكل مجموعه من البشر اللي راحت في حته اكتشفوا حاجات جديده في البيئه الجديده اللي هم كانوا عايشين فيها

وبقوا مضطرين انهم يخترعوا اسماء للحاجات دي علشان يعرفوا يتعاملوا معها 

هل يمكن تعميم لغة موحدة علي كل العالم؟

 هيطلع واحد من المتابعين ويقول انا عندي حل عبقري هحل ليكم بيه المشكله دي كلها

ايه رايكم من نخترع لغه جديده وسهله تبقى لغه عالميه ونتفق كبشر اننا نستخدم اللغه دي وبس ونتعلمها كلنا

ومع مرور السنين يبقى في لغه واحده بس بيستخدمها كل البشر في جميع انحاء العالم ونسهل تعاملات و علاقات الدول مع بعضها

هاقول له فكره جميله بس للاسف احنا كبشر حاولنا نطبق الاقتراح بتاعك ده اكثر من 300 مره لحد دلوقتي كلهم باؤا بالفشل

بالفعل البشر حاولوا أكثر من 300 مره واشهر اللغات دي هي لغه الاسبرانتو وهي لغه عالميه اخترعها العلماء في القرن الماضي

كمحاوله منهم لتعميمها على كل البشر اللي موجودين على كوكب الارض وكانت لغه سهله ودمها خفيف

وبالفعل دعمهم عدد كبير من الدول والمنظمات العالميه وتعلمها الاف الناس وانتشرت في روسيا و اوروبا والامريكتين والصين واليابان وفي بعض اجزاء الوطن العربي

اسباب فشل تعميم لغة موحدة علي العالم؟

لكن يدوب بعد كام سنه بدات لغه الاسبرانتو تضعف وتتلاشى السبب الاساسي في فشل فكره تعميم لغه ثابتة على كل العالم

انه صعب جدا على الشعوب انها تتخلي عني لغيتها الام واللي تمثل هويتها و تاريخها

علشان لغه جديده مالهاش اي تراث حضاري او تاريخي

الغريب بقى انا لو افترضنا جدلا اننا نجحنا في اننا نوحد اللغه وبقى في لغة واحده بيتكلم بها العالم كله

هنتفاجئ مع مرور السنين هتبدا كل مجموعه من الناس الرخمين يحرفوا شويه في اللغه دي وكل واحد يحط التاتش بتاعه ويبوظوا اللغه ثاني

وينتهي الحال انها هيتفرع من اللغه الام دي عدد لا نهائي من اللغات زي الوضع الحالي بتاعنا و لفي بينا يا دنيا

وعدد كبير من المفكرين شايفين ان بالرغم من التقدم الهائل اللي وصلتله البشريه الا ان فكرة توحيد لغه ثابته على الكل شيء في غايه الصعوبه

ومازال حلم توحيد اللغه شيء مستحيل بالنسبه للبعض وامل معلق بالنسبه للبعض الاخر 

النهاية

وبكدا نبقي جاوبنا النهاردة علي سؤال ليه العالم كله مش بيتكلم لغة واحدة؟

ولو في سؤال محتاج تعرف اجابته اكتبه هنا في التعليقات تحت الفيديو دا

علشان نجاوبك عليه في الحلقات اللي جايه

ولو الفيديو عجبكم ما تنسوش اللايك والشير والناس اللي اول مره تشوفنا

اعملوا  سبسكرايب وفعلوا الجرس علشان توصلكم فيديوهاتنا اول باول

واشوفك الحلقه الجايه سلام